ОшМУда спутниктик изилдөөлөр боюнча алгачкы борбор ачылды. Ал илимий иштерди жүргүзүп, эл аралык агенттиктер менен кызматташат.

2025-02-06 03:09:05 120

ОшМУда "Борбордук Азия спутниктен талдоо жана аралыктан зонддоо" боюнча 3-февралда борбору ачылды. Борбордун ачылышында окуу жайдын ректору Кудайберди Кожобековдун жетекчилиги алдында профессордук-окутуучулук курам, жакынкы чет өлкөлөрдөн жана башка окуу жайлардан келген окумуштуулар катышты. Аталган жай Кыргызстанда биринчи жолу спутниктик борбор катары ачылып жатат. Ал университеттин "Келечек муундун ХАБы" борборунун базасында жайгашкан. Бул борбор спутниктин жардамы менен маалыматтарды чогултуп, илимий изилдөөлөрдү жүргүзүүгө мүмкүнчүлүк берет. Учурда ал заманбап жабдуулар менен толукталып, эл аралык долбоорлордо иштөө жана инвестицияларды тартуу мүмкүнчүлүктөрүн сунуштайт. Мындан тышкары, борбордо илимий изилдөөлөрдү жүргүзүүгө толук шарттар түзүлгөн. Бул борбор келечекте Кыргызстанда ушул тармакта адистерди даярдоо максатында ишке ашырылууда. "Борбор аркылуу илимий кызматкерлер, окумуштуулар жана PhD докторанттар жердин кыртышынан баштап, бийик тоолуу аймактарга чейинки ар кандай илимий изилдөөлөрдү жүргүзө алышат. Бул изилдөөлөрдө спутниктен алынган маалыматтар базасын колдонуу өтө маанилүү. Ал аркылуу климаттык өзгөрүүлөрдү изилдеген илимий иштерди жүргүзүү мүмкүнчүлүгү бар", - деп билдирди Кудайберди Кожобеков. Каралган долбоорго ОшМУнун «STEM» инновациялык колледжинин окутуучулары да активдүү катышты. Геодезия адистигинин окутуучусу Ж.Токтосунов агай, геодезиялык приборлор боюнча маалымат берип, Борбордук Азия спутниктен талдоо жана аралыктан зонддоо боюнча өз ой пикирин билгизди. Каралган долбоор боюнча келечек пландарын билгизди. Долбоор алкагында бир нече эл аралык базаларга кирүүгө уруксат алынган. Учурда Америка, Жапония, Кытай, Корея жана Европа өлкөлөрүнүн 25тен ашуун белгилүү спутник агенттиктери менен кызматташуу жүрүп жатат. Ошондой эле аталган борбор дүйнөлүк илимий борборлор менен чогуу иш-чараларды өткөрүп жатат.