Жалал-Абад шаарындагы колледжге мобилдүүлүк сапары жана тажрыйба алмашуу лекциялары

2025-04-05 05:21:31 32

Жалал-Абад шаарындагы колледжге мобилдүүлүк сапары жана тажрыйба алмашуу лекциялары 2025-жылдын 3-апрель күнү STEM инновациялык колледжинин Адистештирилген дисциплиналар бөлүмүнүн “Электр менен камсыздоо (тармактар боюнча)” адистигинин окутуучулары Раева Ж.С., Жусубалиева А.Ж., Жеңишбек уулу Э. жана ЭСс9-1-22 тайпасынын студенттери Жалал-Абад шаарындагы Б.Осмонов атындагы Жалал-Абад мамлекеттик университетинин колледжинин Алдынкы тажрыйба борборуна академиялык мобилдүүлүк жана тажрыйба алмашуу максатында барышты. Иш-чаранын негизги максаты — билим берүү тармагында тажрыйба алмашуу, студенттердин кесиптик билимин тереңдетүү жана аймактар аралык кызматташууну чыңдоо болуп саналат. Сапардын алкагында конок катары барган окутуучу Жусубалиева Айнагүл тарабынан студенттерге арналган лекция өткөрүлүп, анда билим берүүдөгү заманбап тенденциялар, кесиптик даярдыктын мааниси жана практикалык тажрыйбанын ролу тууралуу мазмундуу маалыматтар берилди. Ошондой эле, Жалал-Абад колледжинин окутуучулары да ар түрдүү темаларда мазмундуу лекцияларды өткөрүп, өз тажрыйбалары менен бөлүшүштү. Мындан тышкары, студенттер үчүн колледждин материалдык-техникалык базасы жана окуу лабораториялары боюнча тааныштыруу экскурсиясы уюштурулду. Бул иш-чара студенттердин билимге болгон кызыгуусун арттырып, алардын кесиптик багытын аныктоого өбөлгө түздү. Академиялык мобилдүүлүк сапары билим берүү мекемелеринин ортосундагы кызматташтыкты тереңдетүүгө, окутуучулар менен студенттердин өз ара байланыштарын бекемдөөгө багытталган маанилүү кадам болду.